بنت آل ساموراي (الوحلة)

السلام عليكم:

خوكم موالف من يمشي وهو تايدور..راسو يكون في لارض محدور..

الراس ثقال..و قرب يهبال.

وفي واحد نهار..

مريت من جنب دار..و عقلي بلا شوار..

قاليا هز راسك للسما..أواه،بلارة و بزيف حياتي محزمة.

الله على تبسيمة..ومغاطس الزين في خدود مولاتي حليمة..آيييه هذا هو إسمها.

عمرني نتابهت لها..وخا فايت لي شفتها..

المهم..بلا ما نشعر غمزتها..و حيث ما موالفش..درت بحال غمضة المش..

هي ضحكات..الفرحة و الحيرة في وجهي تخلطات..

غادرت لمكان في الحين.

دازت ثلاث ايام..قلت لازم نكلمها وخا نقول لها غا السلام..

من زهري لقيتها واقفة في باب الدار..مع مول جافيل لعبار..

وصلت حداهم..ضربت شويفة خطيفة..على هذ المخلوقة اللطيفة..

تبهضت..

تا تشوف فيا..فرحاتك آ حمد في هذ الدنيا..تكون سبابها هذ لبنية..

تبسمات ومن بعد لدارهم دخلات..ثقلت الخطوات..بلا ما نعرف آش نوات..عاود بزربة خرجات..و قدامي تمشات..

تبعوها رجليا..بلا ما نعرف كيف جرا ليا..

هي غادا وانا وراها، هي غادا وانا وراها..تقلب ليمن نقلب ليمن، تقلب ليسر نقلب ليسر..

بحال ديبناج جارة تراكتور عواج.

وقفات..دارت لعندي وفيا تلفتات..

وانا مع قليل الخبرة..ما شديت لفرانات..حتا دخلت فيها..

آآآآزدااااااااااااااح.

-آههاه تا بشوية..تا  توكظ توكظ و عقد راسك شي شوية.

-سمحي ليا انا غير نية.

-ما كاين باس، نتا هو حمد ولد الغالية.

-أهه.

-باينة علك ولد الناس، شوف لنطولوه نقصروه..جوج من لحاجة.

-أأأ كيفاش..راه يلاه بدينا النيقاش..و باقي ما تعارفناش..

-آ شنو..تا مالك، ياكما حساب لك اني من اياهم..لتتفلى معاهم..را انا لالاك ولالاهم.

آو تا مال هذي من ارنب تقلبات عقرب..ياكما....لالالالالا كا تبان من الانس.

قاطعت تفكيري..بكلمة كان ما كان لها من الثأتيري..

شوف جي و جيب معاك خروف، ولا و الله حتا نقولها لخويا..

تزيرت و تغيرت..وكلامي قصحت..

تي شكون بغا يكون هذ خوك كاع..

تمنيت كون كاع ما سولت..

انا خت بوسيف..للي كاي زنفر النيف..واللي تلاقا معاه يقول اعوذ بالله يا لطيف.

ها ناري..انا غا ضريف كي ندير مع هذ لكنس لقصيف.

خبروني آش ندير عاطياني مهلة حتال الصيف.

(قعقاع)