موكة

الشيطان اللى دخل لشي راس
تيعود خدام فيه بحال الرقاص
و اللي بغا يتوكد من كلامي
يقرا ما خطيت بالقلم
و صورتو كيف يمكن يتفهم..
الله يهديك يا هذ لمرا
حشمي واخا غا هاد لمرة
فاين غادا ف هذ الليل والسمرة
و مثقلة بهذ لباليزة للي جارة.

*هي تقول:
سمعني أ سيدهم يا ولد لمرة
ما بقا ليا صبر على هذ لحفرة

*قلب مصدوم يتكلم:
واه بالزربة تهدمت العشرة
صافي نسيتي لحلوة و المارة
وا حبي العيشة بلا بيك راها حارة
واش تظني نقدر نبدلك بواحدة آخرى
راه ما تفرقني معاك غا لاخرة
وثبتي ثبتي ما تكونيش ضاسرة
إلى باقي نطلع لك الدم
راني ما نسواش نستاهل السم
إلى باقي نجيب لك شي تقليقة
نستاهل شي تعليقة
و صافي صافي يا لغزال ديالي
عقلتي عل دوك ليام و الليالي
راه ما ساهل ما دوزنا يا الغالي
و حن فيا و سامحني يا هلالي
ياك أنا حبيبك الجيلالي.

*تجيب بعجرفة و غضب:
(والو والو والو ماراجعاش)
إيي ييياي..
ما أنا ليك .. ما أنت ليا
ما درتي لي والو في هذ الدنيا

*(طلع له الدم و خرج ما خزن)
عرفتي آش يجيك مليح يا بنت سي مجواع
آ تريكت البسالة و الصداع
سيري لهلا يرد بوك كاع
ورقتك توصلك من التيساع
بغيت يتلاقاوك الضباع
و هنشرو لك الذراع
أنا حمق و داير فيك راسي
و بارك نواطي علايا لساسي
و نسيت مقامي ما بين ناسي
و عريت نفسي من نخوة الفاسي
على و د مولاة لقلب القاسي

*(هي و الوعيد)
وديرها فين تجيك
و من مكايدي لهلا ينجيك
صافي قلبي ما عاد يبغيك
ولا لساني غا يعاود يسميك

*(بلسان بارد يجيب)
واخا
..آ موكة
..

(قعقاع)