الغربة

يما
ولدي عن عيني غاب
زاد خلفة وترك لمكان خراب
يما
الولد دخل طريق كل ضباب
ماشي تابع السراب
يما
ضاق لحال بيه و خوا لبلاد
شفت الحݣرة ف عينيه و دمعو على خدو هواد
يما
فضل عشرة لغراب
من بعد ما خلا فين دق الباب
يما
لاش فرق لحباب؟
خلا ميمتو و لصحاب
يما
لكبدة هشيشة تحرقات
بالحسرة عليه لقلب طاب
يما
فراقو ليا صعيب
بالي معاه يرجع قريب
يما
نتسنى مرسول يدق لباب
يجيبلي من عد وليدي كتاب
يما
رب ياخد الحق ف لكان سباب
خلاه يهجر ناسو و يقصد لغراب
يما
نطلب ربي يلطف بينا ف لمكتاب
و اللي قهرونا يسلط علهم أشد العذاب

(قعقاع)