بومقدة

بومقدة
بومقدة حياتو عطالة كلها شدة
مرافق غير مع الكاس و اللذة
خرج على ذاتو و قتل لكبدة
بومقدة فقير و محروم من لمبدا
قلب حجر و يد طويلة تتعدى
عيونو جمرة و ديما هاز لمضا
كلمة جوج خرجت المقدة
لا شد واحد بحال شاد ش مخدة
من يحتاج  البلية ('0')
خاصو كيفاش يحضرها و يتقضى
فعايلو فعايل لجباه ليها تندى
غير يجمع اللعاقة يتبسم و يهدا
ياخذ المعدومة(الزطلة) و يطلع نيشان السدّة.
كيف يثقال له دماغ..
يخرج يشوف من باغي له يتحدى
***  ***  ***
واحد خونا بغا ينهيه، زغب راسو و قاليه:
مالك آ بومقدة على هذ لحالة
ديما منوض في الدرب قربالة
ناس منك عادت تتشكى و زعفانة.
صكع طير لبومقدة الذبانة
خطوة جوج لقاه حدا راسو
ببونية تشتو ليه ضراسو
و خذا له رزقو و فلوسو
دخلوا...لفكاكة
لعباد تزاوك و راس بومقدة تبوسو
وا .. للي غلب إي يعف
هدا بومقدة و فرتت طرف
طارت له الكانة..خاصو يبرم و يتكيف
بومقدة قال لخونا لعاد يتفتف:
شوف آ بوصيحة
لا تبقاش دفع ديك صنطيحة
لمرة جاية بحال والو راك ذبيحة
***  ***  ***
بوصيحة مسكين
كرامتو نداست بين الرجلين
تحكر بين قوم لواقفين
توخر عل الجوقة و سلت
ما قصد غا مالين الوقت
قال في نفسو هما نصير للتشمت
خونا عاود لهم الواقعة كيف طرات
وراهم من الدم شي نقيطات
بطبيعت الحال زاد شوية فيخرات
القضية زعمة راها حماة
مللي الواشمة عطاتها لغوات
دخلوا الحومة طلقوا دوك لعوينات
و لكن الوقت كان فات
كيف موالفين طول لوقات

(قعقاع)